मुख्यमन्त्री शाहलाई स्वतन्त्र सांसद जोशीले विश्वासको मत नदिने

सुदूरपश्चिम प्रदेशका मुख्यमन्त्री कमलबहादुर शाहलाई स्वतन्त्र सांसद डाक्टर तारा जोशीले विश्वासको मत नदिने भएका छन् ।

मुख्यमन्त्रीले प्रदेश सभामा बहुमत नपाउने निश्चित भएपछि आफूले विश्वासको मत दिन आवश्यक नरहेको जोशीले बताएका छन् ।‘सरकारमै भएका सांसदहरुले विश्वासको मत नदिने भएपछि मैले दिइरहनु परेन। अहिले म काठमाडौंमै छु’, डा.जोशीले भने ।

जोशीले भने, ‘विश्वासको मत पाउने भए अर्को कुरा हुन्थ्यो, तर मलाई पनि सजिलै भयो’ । नागरिक उन्मुक्ति पार्टी (नाउपा) का सातै जना प्रदेशसभा सदस्यले विश्वासको मत दिएमा मुख्यमन्त्री शाहको पद जोगाउन जोशीको मत निर्णायक हुन्थ्यो। ५३ सदस्यीय प्रदेशसभामा कांग्रेससँग १९ र नाउपासँग ७ सिट छ । नाउपाका सबै सांसदले मत दिएमा एक सांसद अपुग हुन्थ्यो र स्वतन्त्र सांसद जोशीको मत लिएर सरकार जोगाउने मुख्यमन्त्री शाहको तयारी थियो ।

बहुमत जुटाउन मुख्यमन्त्री शाहले नाउपाका पाँच जनालाई मन्त्री बनाएका छन् । तर मन्त्री नरहेका नाउपाका दुई सांसदले विश्वासको मत नदिने भएपछि स्वतन्त्र सांसद जोशीले पनि मत नदिने भएका छन् ।

 ‘म मेरो सांसदहरुसँग काठमाडौंमै छु, उहाँहरुले मत दिनु हुन्न’, नाउपाका अध्यक्ष रञ्जिता श्रेष्ठले भने । उनी अरु सांसदहरुले पनि मुख्यमन्त्रीलाई विश्वासको मत नदिने बताउँछन् । ‘विश्वासको मत नदिन ह्वीप जारी गरिएको छ, त्यसैले मत दिने कुरा हुन्न’, श्रेष्ठले भनिन् । यद्यपि नाउपा प्रदेश संसदीय दलले विश्वासको मत दिने निर्णय गरेको छ । यो निर्णय बमोजिम सरकारमा सहभागी ५ मन्त्रीले विश्वासको मत दिँदा मुख्यमन्त्री शाहको पक्षमा २४ मत पुग्ने देखिन्छ ।

यो मत प्रदेशसभाको अल्पमत हो । प्रदेशसभा सचिवालयले बिहीबार ३ बजेका लागि संसद बोलाएको बैठक आज ५ बजेका लागी सारिएको छ । बिहीबार मुख्यमन्त्री शाहका लागि विश्वासको मत लिने अन्तिम दिन हो ।सुदूरपश्चिममा काँग्रेसका १८, माओवादी केन्द्रका ११, एमालेका १०, नागरिक उन्मुक्तिका सात, एकीकृत समाजवादीका चार, राप्रपाका एक र एक जना स्वतन्त्र प्रदेश सभा सदस्य रहेका छन्। सुदूरपश्चिममा बहुमतको सरकार गठनका लागि २७ जना प्रदेश सभा सदस्यको मत आवश्यक पर्छ।