स्थायी समितिको निर्णयमा खगराजको गम्भीर असहमति, राजनैतिक आत्महत्याको दिशामा धकेलेको आरोप(पत्रसहित)

नेकपा माओवादी केन्द्रका स्थायी समिति सदस्य खगराज भट्टले आजको स्थायी समिति बैठकको निर्णयमा गम्भीर असहमति दर्ज गरेका छन् । उनले आफ्नो ३४ वर्षको राजनैतिक र साङ्गठनिक जीवन समाप्त पार्ने डिजाइन अनुसार स्थायी समितिले निर्णय गरिएको बताएका छन् ।

माओवादी अध्यक्ष पुष्पकमल दाहाल प्रचण्डलाई सम्बोधन गरेर उनले चार प्रश्न गरेका छन् । स्थायी समिति बैठकले गरेको निर्णयले सुदूरपश्चिम प्रदेशको पार्टी भित्र देखिएको अराजकतालाई निरुत्साहित गर्ने वा प्रोत्साहित गर्ने भन्दै प्रश्न गरेका छन् ।त्यस्तै इमानदार कार्यकर्तालाई निरुत्साह गर्ने वा प्रोत्साहित गर्ने , पार्टी संस्थागत निर्णयबाट सञ्चालन हुन्छ या अमुक व्यक्तिको चाहानाबाट भन्दै प्रश्न गरेका  भट्टले अराजकतालाई दण्डित गर्नु पर्ने अवस्थामा झन् प्रशय गर्ने कदमले पार्टीमा दण्डहीनताले कस्तो रूप लिन्छ भनेर सोधेका छन्  ।

आज स्थायी समिति बैठकले प्रदेशको इन्चार्ज र सहइञ्चार्ज टुङ्गो लगाएको थियो । भट्ट सुदूरपश्चिम माओवादीका शीर्ष नेता हुन् तर, उनी इन्चार्ज वा सहइञ्चार्ज कुनै जिम्मेवारी पाएनन् । त्यस्तै माघ १२ गते बहुमतले भट्टलाई संसदीय दलको नेताबाट हटाएको थियो  । उक्त निर्णयलाई पनि स्थायी समिति बैठकले हस्तक्षेप नगरेपछि भट्टले असहमति प्रकट गरेका हुन् ।