वनले पक्राउ गरेका व्यक्तिलाई वन मन्त्री धामीले हिरासतबाटै भगाएपछि…..

उनलाई पक्राउ गरी सशस्त्र वन सुरक्षा शाखा (वन हिरासत) धनगढीमा बरबुझारथ गर्ने क्रममै मन्त्री धामी स्वयं उपस्थित भई सशस्त्र वन सुरक्षाकर्मीहरूलाई गाली गलौच गर्दै धम्की दिई उनलाई भगाएको बताइएको छ । मन्त्री धामीले जलाइदिने धम्की दिँदै वन कार्यालयको गाडी समेत नियन्त्रणमा लिएको श्रोतको दाबी छ ।

यस बारे मन्त्री धामी सँग बुझ्दा वन कर्मचारीले निर्दोष व्यक्तिलाई फसाउन खोजेको दाबी गरेका छन् । “निर्दोष मान्छेलाई मुद्दा लगाउन पाइँदैन । म आफै फिल्डमा गएको छु । त्यहाँ अतिक्रमण भएको छैन । बस्ती बसेको ठाउँमा वनले हात नहाल्ने भनेर नीति नै बनाएका छौ । मैले मोटरसाइकल ल्याउन पठाएको मान्छेलाई पक्राउ गर्ने तिनीहरूले ? कर्मचारी आफैले रुख काट्ने अनि अरूलाई आरोप लगाउन मिल्छ ? तपाई जे जे लेख्नुहुन्छ लेख्नुस् । मेरो कर्मचारीलाई कसरी परिचालन गर्ने त्यो मेरो काम हो ।” उनले भने ।

डिभिजन वन कार्यालय पहलमानपुरका अनुसार भजनी नगरपालिका ९ को सयपत्री सामुदायिक वनका उपाध्यक्ष समेत रहेका जितबहादुर बडैलाले करिब ४/५ वर्ष अघि देखी ३ रोपनी वन क्षेत्र अतिक्रमण गरी फलफूलका बोटहरू लगाएका थिए ।

सुरु देखी नै अतिक्रमणको विरुद्ध रहेका स्थानीय उपभोक्ताहरूले अतिक्रमण हटाउने प्रयास गरे तर सम्भव भएन । अतिक्रमण हटाउनका लागी उपभोक्ताहरूले वन कार्यालय गुहार्न थाले । वन कार्यालयले पनि बडैलालाई अतिक्रमण हटाउन परिपत्र गर्न गर्न थाल्यो । तर बडैलाले कसैलाई टेरेनन् । उल्टै उपभोक्तालाई धम्काउने र वन कर्मचारीलाई आक्रमण गर्न थाले । उपभोक्ताहरूले आफूहरूले पनि फलफूल खेती गर्ने र आफूहरूलाई पनि वन क्षेत्र भोगाधिकार दिनु पर्ने माग राख्दै डिभिजन वन कार्यालय पहलमानपुरमा धर्ना बस्न थाले ।

चौतर्फी दबाब परेपछि डिभिजन वन कार्यालय पहलमानपुरले वन क्षेत्र खाली गर्न भन्दै असोज १० गते उपभोक्ताहरूको सहकार्यमा बडैलाले लगाएका फलफूलका बोटहरू कटान ग¥यो । आफूलाई फसाउने नियतले सोही दिन राती बडैलाले केही सालका रुखहरू कटान गरेको वन कार्यालयको दाबी छ । यता बडैलाले भने आफूलाई फसाउन वन कर्मचारीले नै रातीको समयमा सालका रुखहरू काटेको अडान कसिरहेका छन् । सालका रुखहरू कटान गरेकाले वन ऐन अनुसार कारबाही गर्ने भन्दै बडैलालाई वन कार्यालयले खोजिरहेको थियो भने बडैला पनि सोही दिन देखी फरार थिए । मङ्गलवार मात्रै उनलाई वन कार्यालयले पक्राउ गरेको थियो ।