घोडाघोडी प्रअ प्रकरण: बमका विरुद्ध राष्ट्रिय माविका शत प्रतिशत शिक्षकले गरे हस्ताक्षर

कैलालीको घोडाघोडी नगरपालिकामा प्रधानाध्यापक नियुक्ती विवाद चुलिएका बेला राष्ट्रिय माध्यमिक विद्यालय सुखडका शिक्षकहरूले विद्यालयका प्रधानाध्यापक धन बहादुर बम (आकाश)  का विरुद्ध हस्ताक्षर गरेका छन् ।
जेठ ९ गते विद्यालयमा हाजिर रहेका शत प्रतिशत शिक्षकहरूले सोही विद्यालयमा कार्यरत मा.वि.तृतीय श्रेणी स्थायी शिक्षक माधव कुमार शर्मालाई प्रधानाध्यापक बनाउनु पर्ने भन्दै हस्ताक्षर गरेका हुन् ।
प्रधानाध्यापक बमले विद्यालयका शिक्षकहरू (स्टाफ) सँग समन्वय नगर्ने गरेको , विद्यालयको पूर्वाधारका लागि पुर्वीबजार व्यवस्थापनका लागि पहल नगरेको, कर्मचारीले पाउने सञ्चयकोष नहालेको, विद्यार्थी संख्या घट्दै गएको भन्दै बमका विरुद्ध हस्ताक्षर गर्नु परेको एक शिक्षकले बताए । पछिल्लो समय विद्यालयले जसरी गति ली रहेको थियो उहाँ आएपछि त्यो हुन सकेन । विद्यालय पूर्वाधारका लागि जसरी काम भइरहेको थियो सबै रोकिए ।विद्यालय हाजिर भएदेखि एकलौटी गर्दै जानुभएको छ । कुनै कुरामा पनि हामी सँग समन्वय गर्नु हुँदैन अर्का शिक्षकले निर्भीक पोष्ट सँग भने ।

शिक्षक माधव कुमार शर्माले समेत आफूलाई प्रधानाध्यापकमा नियुक्ती गर्नु पर्ने भन्दै विद्यालय व्यवस्थापन समितिका अध्यक्ष खगेन्द्र हमाल समक्ष निवेदन दिएका छन् ।
अध्यक्ष हमालले यस विषयमा नगरपालिकाको शिक्षा शाखामा र शिक्षकहरू सँग छलफल गरेर निर्णय गर्ने बताएका छन् । सरहरूले हस्ताक्षर गरेर मलाई दिनुभएको छ । माधव सरले समेत निवेदन पेस गर्नु भएको छ । छलफपछी मात्रै के गर्ने भन्ने निर्णय आउला उनले भने ।

घोडाघोडी नगरपालिकाभित्र रहेका ५१ वटा विद्यालयका प्रधानाध्यापकका लागि २०८१ साउन ४ गते पालिकाले खुल्ला आवेदन माग गरेको थियो । जसमा २७ जना प्रधानाध्यापकहरू खुला प्रतिस्पर्धाबाट छनोट भएका थिए । सोही अनरुप नि.मा.वि. तहका बम राष्ट्रिय मावि सुखडमा प्रअ नियुक्ती भएका थिए । त्यस बेला रिक्त रहेको मावि तह दरबन्दीमा २०८१ कात्तिक ११ गते लेखा विषयका स्थायी शिक्षक माधव कुमार शर्मा हाजिर भएका थिए ।