तिज नृत्य प्रतियोगिताको विजेता बन्यो बालबाटिका 

कैलालीको बर्दगोरियामा सम्पन्न पालिका स्तरीय तिज नृत्य प्रतियोगिताको विजेता नवलपुर बालबाटिका विद्या मन्दिर बौनियाँ बनेको छ । प्रतियोगितामा दोस्रो र तेस्रो स्थान भने क्रमशः आदर्श सामुदायिक विद्या मन्दिर बौनियाँ र महुन्याल माध्यमिक विद्यालय बासकोटीले हासिल गरेका छन् । 

प्रथम स्थान हासिल गर्ने बालबाटिकाले नगद ७ हजार ५ सय सहित ट्रफी र प्रमाणपत्र प्राप्त गरेको छ । यस्तै दोस्रो बनेको आदर्श सामुदायिकले नगद ४ हजार ५ सय सहित ट्रफी र प्रमाणपत्र र तेस्रो  बनेको महुन्याल माध्यमिक विद्यालयले नगद २ हजार ५ सय सहित ट्रफी र प्रमाणपत्र प्राप्त गरेका छन् । बर्दगोरिया साहित्य तथा सांस्कृतिक मञ्चको आयोजनामा भएको प्रतियोगितामा पालिका भरीका ९ विद्यालयको सहभागिता रहेको थियो । 

पुरस्कार वितरण गर्दै कार्यक्रमका विशिष्ट अतिथि एवम् बर्दगोरिया गाउँपालिकाका उपाध्यक्ष गणेशराज गिरी (लाल्दीप) ले संस्कार र संस्कृति संरक्षणका लागी यस्ता कार्यक्रमहरूले निरन्तरता पाउनु पर्ने बताउँदै सरकार यस विषयमा गम्भीर बनेर लागी परेको बताए । 

कार्यक्रमको समापन गर्दै बर्दगोरिया साहित्य तथा सांस्कृतिक मञ्चका अध्यक्ष भरत ताम्राकारले यो अभियानलाई सिरिजका रूपमा अघि बढाउने योजनामा रहेको बताए । कला साहित्यको संरक्षण, उजागर र व्यवहारिक बनाउन यो संस्था निरन्तर रूपमा अग्रसर बनेको पनि उनले बताए ।