आफ्नो कुकुरलाई ढुङ्गा हानेको भन्दै शिक्षकले कुटे विद्यार्थी 

कैलालीको धनगढीमा शिक्षकको कुटाइबाट एक विद्यार्थी घाइते भएका छन् । धनगढी उपमहानगरपालिका वडा नम्बर १३ स्थित जनता माध्यमिक विद्यालयका शिक्षक नरेश भट्टको कुटपिटबाट सोही विद्यालयको कक्षा १० मा अध्ययनरत १६ वर्षीय छात्र प्रवीण राना घाइते भएका छन् ।

बाटोमा हिँडिरहेका बेला शिक्षकले निर्घात कुटपिट गरेको घाइते प्रवीणकी दिदी सिमाना रानाले बताइन ।` गयराती भाइ गाउँबाट घर आउँदै थियो । बाटोमा शिक्षक नरेश भट्ट सरको कुकुर टोक्न आएपछि भाइले कुकुरलाई ढुङ्गाले हान्यो । कुकुरलाई किन हानिस् भनेर सर र उनका भाइ चेतराज भट्ट मिलेर लट्ठीले भाइलाई कुटे,´सिमानाले भनिन् ।

कुटपिटबाट घाइते प्रवीणलाई उपचारका लागि धनगढी स्थित माया मेट्रो अस्पताल लगिएको छ । उनको खुट्टा र छातीमा चोट छ ।

शिक्षक नरेश भट्टले सामान्य विवादलाई ठुलो विषय बनाउन आवश्यक नरहेको बताए । `सम्झाउन खोज्दा आरोप लाग्यो भाइले पनि लट्ठी हानी हाल्यो । आफ्नै विद्यार्थी अनि छिमेकी पनि हो उपचाररत खर्च मैले बेहोर्ने सहमति भएको छ,`शिक्षक भट्टले भने ।