गोदावरीका हाकिम चढ्ने गाडी मध्य राती दुर्घटना

कैलालीको गोदावरी नगरपालिकाका प्रमुख प्रशासकीय अधिकृत हरिदत्त भट्ट चढ्ने गाडी बिहीबार राती दुर्घटनामा परेको छ । हाकिम चढ्ने निजी नम्बर प्लेटको बा १६ च ८७८८ नम्बरको गाडी पालिकाको वडा नम्बर १० खमौरामा दुर्घटनामा परेको हो ।

नगरपालिकाका अनुसार दुर्घटनामा गाडीको अगाडीको भागमा क्षति पुगेको छ । स्थानीय उद्धव देउवा र लोक देउवाको घरअघिको पर्खालमा पनि क्षति पुगेको छ । चालक भने सकुशल छन् । स्थानीयका अनुसार गाडी चालक विक्रम चौधरीले अत्यधिक मदिरा सेवन गरी गाडी चलाएका कारण दुर्घटना भएको हो । यस विषयमा बुझ्न खोज्दा प्रमुख प्रशासकीय अधिकृत भट्टले आफूलाई यस बारेमा जानकारी नभएको र चालकलाई बुझ्ने काम भइरहेको भए पनि उनी सम्पर्कमा नआएको बताए । नगरपालिकाले निजी नम्बर प्लेटको गाडी मासिक ९० हजार भाडा दिने प्रयोग गर्दै आएको छ ।