प्रधानमन्त्रीले असार २८ गते संसद्मा विश्वासको मत फेश गर्ने

काठमाण्डौ : प्रधानमन्त्री पुष्पकमल दाहाल ‘प्रचण्ड’ ले यही असार २८ गते शुक्रबारका दिन संसद्मा विश्वासको मत लिने भएका छन् ।

नेकपा एमालेले सरकारमाथिको समर्थन फिर्ता लिएसँगै प्रधानमन्त्री दाहालले संसदबाट विश्वासको मत लिन लागेका हुन् ।

कांग्रेससँगको सत्ता सहकार्यको सहमतिसँगै नेकपा एमाले सरकारबाट बाहिरिसकेको छ । सरकारमा सहभागी दलहरूमध्ये कुनै एक दलले आफ्नो समर्थन फिर्ता लिँदा प्रधानमन्त्रीले संविधानको धारा १०० को उपधारा २ बमोजिम ३० दिनभित्र विश्वासको मत लिनुपर्ने कानुनी प्रावधान रहेको छ ।

प्रधानमन्त्रीले सङ्घीय संसद् सचिवालयमा पत्राचार गर्दै असार २८ गतेको प्रतिनिधिसभा बैठकको कार्यसूचीमा विश्वासको मतको प्रस्ताव समावेश गर्ने जनाएका छन् ।