नागरिक उन्मुक्तिले सत्ता गठबन्धनलाई समर्थन गर्ने अध्यक्ष रञ्जिता पक्षको निर्णय

नागरिक उन्मुक्ति पार्टीले नेकपा एमाले, नेकपा माओवादी र रास्वपासहितको गठबन्धनलाई समर्थन गर्ने आज निर्णय गरेको छ ।

बुधबार पार्टी अध्यक्ष रञ्जिता श्रेष्ठको अध्यक्षतामा टीकापुरमा बसेको संस्थापक केन्द्रीय सदस्यको बैठकले संघ र प्रदेश सरकारमा नयाँ गठबन्धनलाई समर्थन गर्ने निर्णय गरेको छ । उन्मुक्तिले सबै तहको सरकारमा सत्ता गठबन्धनलाई समर्थन गरेर अघि बढ्ने निर्णय गरेको पार्टी श्रेष्ठले जानकारी दिएकी छन् । २१ जना केन्द्रीय सदस्य मध्ये बैठकमा १२ जना सहभागी भएका थिए ।

प्राविधिक समस्याका कारण केही केन्द्रीय सदस्य बैठकमा सहभागी हुन नसकेको बताइएको छ । यसअघि पार्टीका संरक्षक रेशमलाल चौधरी पक्षीय संस्थापक केन्द्रीय सदस्यको बैठकले प्रचण्ड नेतृत्वको सरकारलाई समर्थन नगर्ने निर्णय गरेको थियो । तर, अध्यक्ष श्रेष्ठले भने प्रचण्डलाई विश्ववासको मत दिन ह्वीप नै लगाएकी थिइन् ।

सुदूरपश्चिम प्रदेशमा संरक्षक रेशमलाल चौधरीको जोडबलमा नागरिक उन्मुक्तिका पाँच जना सांसद कांग्रेस नेतृत्वको सरकारमा मन्त्री बनेका छन् । अध्यक्ष श्रेष्ठले समर्थन फिर्ता लिन निर्देशन दिए पनि प्रदेश संसदीय दलले भने मुख्यमन्त्री कमलबहादुर शाहलाई नै समर्थन गर्ने निर्णय गरेको थियो ।