आईपीएल क्रिकेट : आइतबार सम्पन्न खेलमा चेन्नाई र कोलकाता विजयी

सुखड : भारतमा जारी १७ औं संस्करणको इन्डियन प्रिमियर लिग (आईपीएल) क्रिकेटमा आइतबार दुई खेल सम्पन्न भए । जसमा चेन्नाई सुपर किंग्स र कोलकाता नाइट राइडर्स विजयी भएका छन्।

आइतबार पहिलो खेलमा कोलकाताले लखनउ सुपर जायन्टसलाई ८ विकेटले पाखा लगायो ।

यो सँगै कोलकाता पाँच खेलमा चार जित हात पार्दै ८ अङ्कका साथ तालिकाको दोस्रो स्थानमा रहेको छ । हार बेहोरेको लखनउ भने छ खेलमा तिनमा जित निकाल्दै अङ्क तालिकाको पाँचौं स्थानमा रहेको छ ।

यस्तै गएराति नै भएको अर्को खेलमा चेन्नाईले मुम्बई इण्डियन्सलाई २० रनले पराजित गर्दै चौथो जित हात पार्यो । मुम्बईका लागि ओपनर रोहित शर्माले अविजित १ सय ५ रनको शतकीय पारी खेल्दा पनि जितको लागि प्रयाप्त हुन सकेन ।

यो सँगै छ खेलमा चार जित हात पार्दै चेन्नाई अङ्क तालिकाको तेस्रो स्थानमा रहेको छ भने छ खेलमा दुईमा मात्रै जित हात पारेको मुम्बई अङ्क तालिकाको आठौं स्थानमा रहेको छ ।

आईपीएल क्रिकेटमा आज एक खेल हुँदै छ जहाँ अङ्क तालिकाको चौथो स्थानमा रहेको सनराइजर्स हैदरावाद र अङ्क तालिकाको पुछार ( दशौं स्थान) मा रहेको रोयल च्यालेन्जर्स रोयल च्यालेन्जर्स बेंगलुरु भिड्दै छन् । खेल नेपाली समय अनुसार राति पौने आठ बजे हुनेछ।

हाल सम्म हैदरावादले पाँच खेल खेल्दा तिनमा जित निकालेको छ भने बेंगलुरुले छ खेल खेल्दा एकमा मात्रै जित हात पारेको छ ।